أعلن الزميلة كارولين بزي عن عزوفها عن الترشح للانتخابات البرلمانية المقبلة وكتبت على صفحتها على فيسبوك: ”
اول ما أعلنت ترشحي على الانتخابات من حوالي شهرين، تلقيت دعمي كتير من مواقع الكترونية وزملاء ومن اهلي واصحابي… اما وبسبب هالخطوة اكيد عرفت مين بحبني ومين بيكرهني، ومين قلل من شأني لأسباب عدة ما بعرفها، ومين اعتبر الفكرة “مهضومة” ومين اعتبرها تحدي وجرأة وغيره.. بالنسبة للناس اللي اعتبروا الفكرة مهضومة فهني أخطأوا كتير لأنه لما ترشحت كان بسبب القرف واليأس اللي عم نعيشه، ولأنه كنت عم فكر اني رح اقدر غيّر بهيدي الطريقة بما اني مش قادرة غير شي ضمن عملي الصحفي.. وبالتالي الفكرة مش مهضومة على قدر ما هالخطوة بتحملنا مسؤولية ومسؤولية كتير كبيرة.
كمان في ناس اعتبروا انه ترشيحي مش جدي لأنه بنشر صوري ولكن بعتقد صورة المرشح التقليدي الرسمية مش ضروري تكون صح.. انا صحافية أولا ولا زلت امارس عملي الصحفي.. كمان انا شخص جدي كتير بإطار عمله وبيمزح وبيضحك وبيسخر خارج هالاطار، وحساباتي على مواقع التواصل الاجتماعي الي وخاصين فيي..
اما في ما يتعلق باللوائح فلم أستطع أن اتحالف مع اي لائحة، ليه؟!
لأنه بالتأكيد القوى السياسية مش رح تدعمني.. لأنني لم انتسب يوما لحزب او تيار سياسي لو كنت بأيد بعض المواقف.
ثانيا، لأنه اغلب الناس اللي بيدعوا انه عندهم رحابة صدر وبيتقبلوا الآخر هني اكتر ناس مش مستعدين يتقبلوا غير “الشعارات الرنانة” اللي بيفلقونا فيها، وطبعا الغير قابلة للتطبيق.
ثالثا، ما بعرف اتلون واتملق ولا بعرف ساير، لحوز رضا زعيم و حزب او ما بعرف مين.
انا بالتأكيد ضد الفساد والهدر وكل الشعارات اللي منرفعها لنكسب عطف الناس، بس فعليا كان هدفي الشباب وهدفي انا لأني جزء منهم، ليبقى عندي امل وابقى بهالبلد.. في ناس كتير سألوا وقالوا اكيد عايشي برا ومعي جنسية اجنبية، بحب قلهم اني خلقت بلبنان وما بعمري اخدت غير جنسية.
بدي أشكر كتير كل الناس اللي دعموني ولقوا فيي فرصة للتغيير، وبدي أشكر أهالي حاصبيا ومرجعيون اللي تلقيت منهم دعم كتير كبير علما اني ما كنت بعرف حدا هونيك. اكيد بدي أشكر أهالي بلدتي بنت جبيل اللي كانوا فخورين فيي، مش بس بلبنان وكمان اللي عايشين بأميركا واعربوا عن رغبتهم بدعمي..
